Korrupsiyaga qarshi kurashish
DAVLAT MULKI OBYEKTLARIDAN SAMARALI FOYDALANISH MARKAZI DIREKTORINING MUROJAATI
Davlat mulki obyektlaridan samarali foydalanish markazi direktoriXalpayev Ilhom Islomovichning korrupsiyaga qarshi kurashishboʻyicha jamoatchilik va tizim xodimlarigaMUROJAATI
Qadrli yurtdoshlar, hurmatli hamkasblar!
Yurtimizda tadbirkorlikni rivojlantirish, ish oʻrnini yaratish, investitsiyalarni jalb qilish, innovatsiya va eksportni koʻpaytirish eng asosiy yoʻnalishlar etib belgilangan.
Davlat mulki obyektlaridan samarali foydalanish markazimiz tomonidan tadbirkorlik subyektlarini doimo qoʻllab-quvvatlash, ularga ishlab chiqarish va xizmatlar koʻrsatish maqsadida davlat mulki boʻlgan obyektlarini ijaraga berishda bizga katta masʼuliyat yuklatilgan.
Markazimiz faoliyati halollik, shaffoflik va javobgarlik tamoyillariga tayanadi. Biz korrupsiyaga nisbatan “toqatsizlik” siyosatini yuritamiz va bu — faqat shior emas, balki kundalik ish uslubimizdir.
Davlat boshqaruvining koʻplab tarmoqlari qatorida Markaz tizimida korrupsiyaning oldini olish, faoliyatni raqamlashtirish, ochiqlikni taʼminlash borasida bir qator ishlar amalga oshirildi.
Xususan, oʻtgan qisqa vaqt mobaynida:
davlat koʻchmas mulk obyektlarini xususiy sektorga auksion orqali ijaraga berish, ijaradan tushumlarni avtomat taqsimlash, ijara tushumlarini undirishni oʻz ichiga olgan tizim joriy etildi.
Markaz tizimida korrupsiyaga qarshi kurashish boʻyicha masʼul boʻlim faoliyati yoʻlga qoʻyilib, korrupsiyaviy holatlar tizimli ravishda oʻrganilib, bunday holatlarni keltirib chiqaruvchi sabab va shart-sharoitlarni bartaraf etish yuzasidan aniq choralar koʻrilmoqda;
Shu bilan birga, xodimlar oʻrtasida halollik va ochiqlik tamoyillarini mustahkamlashga qaratilgan tushuntirish va profilaktik ishlar muntazam amalga oshirilmoqda.
Taʼkidlash joizki, Markaz tizimida “korrupsiyadan holi” muhitni yaratish, byurokratiya va manfaatlar toʻqnashuvi holatlariga batamom chek qoʻyish boʻyicha amaliy harakatlarni izchil davom ettiramiz.
Aziz yurtdoshlar, sohaning fidoyi zahmatkashlari!
Halollik — bizning eng katta kuchimiz, shaffoflik — bizning ish uslubimiz, ishonch — bizning eng katta kapitalimiz!
Har bir qadam ortida xalq manfaati turishi kerak, har bir harakatimiz — masʼuliyat, har bir jarayon — ochiq va adolatli boʻlishi shart!
Men sizlarni:
- manfaatlar toʻqnashuviga yoʻl qoʻymaslikka;
- har qanday noqonuniy taʼsirni rad etishga;
- elektron auksion va raqamli nazorat orqali shaffoflikni mustahkamlashga;
- jamoada halollik madaniyatini kuchaytirishga chaqiraman.
Shunday ekan, Markaz tizimidagi har bir xodim oʻz faoliyatida korrupsiya holatlarining oldini olishga va unga chek qoʻyishga masʼul ekanligini yana bir bor taʼkidlab oʻtmoqchiman.
Markaz tizimida mehnat qilayotgan barcha xodimlarni korrupsiya holatlarining har qanday koʻrinishlariga nisbatan murosasiz munosabatda boʻlishga, oʻz xizmat vazifalarini halol va xolis bajarishga chaqirib qolaman.
Hurmat bilan,I.Xalpayev
Korrupsiyaga befarq boʻlmang! Korrupsiya haqida xabar bering!